चिपळूण नगर परिषदेत उपनगराध्यक्ष आणि स्वीकृत नगरसेवक पदासाठी राजकीय चर्चा तळघरात
- by Yogesh Bandagale
- December 31, 2025
- 385 views
चिपळूण : चिपळूण नगर परिषदेमध्ये नगराध्यक्ष उमेश सकपाळ यांनी पदभार स्वीकारल्यानंतर आता उपनगराध्यक्ष कोण होणार आणि स्वीकृत नगरसेवक कोण असतील, यावर स्थानिक राजकीय चर्चेला गती मिळाली आहे. नगरपालिकेत सध्या शिवसेना आणि भाजप यांची सत्ता असून नगराध्यक्ष शिवसेनेचा असल्यामुळे सहजिकच उपनगराध्यक्ष पद भाजपकडे जाईल, अशी अपेक्षा व्यक्त केली जात आहे.
उपनगराध्यक्ष पदासाठी सध्या दोन प्रमुख दावेदारांची नावे चर्चेत आहेत. चौथ्यांदा नगरपालिकेत आलेले शशिकांत मोदी आणि दुसऱ्यांदा नगरपालिकेत आलेल्या रसिका देवळेकर यांची चर्चा सुरू आहे. स्थानिक राजकीय वर्तुळात दोघांनाही उपनगराध्यक्ष पदासाठी मजबूत दावेदार मानले जात आहे.
नगरपालिकेत स्वीकृत नगरसेवक पदासाठी तीन जागा आहेत. शिवसेना पक्षाकडून या पदासाठी विकी लवेकर आणि सुयोग चव्हाण यांची नावे आघाडीवर आहेत. तर उद्धव बाळासाहेब ठाकरे शिवसेनेकडून चिपळूण अर्बन बँकेचे अध्यक्ष मोहनशेठ मिरगल आणि फैसल कासकर यांची नावे चर्चेत आहेत.
भाजपकडून स्वीकृत नगरसेवक कोण होईल, याबाबत अद्याप अधिकृत माहिती समोर आलेली नाही. मात्र माजी नगरसेवक विजय चितळे यांच्या नावाचा विचार होऊ शकतो, अशी चर्चा राजकीय वर्तुळात सुरू आहे.
राजकारणी व स्थानिक नागरिकांचे मत असे आहे की, या पदांची अंतिम निवड नगर पालिकेतील सामंजस्य, पक्षीय वाटाघाटी आणि अनुभव यावर अवलंबून राहणार आहे. शहरातील राजकीय संतुलन आणि प्रशासनिक कामकाज यावर देखील या निर्णयाचा मोठा परिणाम होणार आहे.
सध्याच्या परिस्थितीत, नगरपालिकेत कामकाज सुरळीत चालवण्यासाठी नगराध्यक्ष उमेश सकपाळ यांच्या नेतृत्वाखाली आगामी निर्णय प्रक्रिया सुरळीत पार पडावी, यासाठी दोन्ही पक्षांची सहमती आवश्यक आहे, असे मत राजकीय विश्लेषक व्यक्त करतात.
नगरपालिकेतील उपनगराध्यक्ष आणि स्वीकृत नगरसेवक पदांची अधिकृत घोषणा लवकरच होणार असून, त्यानंतर नगरपालिकेतील धोरणात्मक निर्णय, प्रकल्प आणि विकास कार्यांवर नागरिकांचे लक्ष लागणार आहे.
