जिल्हास्तरीय ‘चाचा नेहरू बाल महोत्सव’ उत्साहात; ३०० विद्यार्थ्यांचा सहभाग
- by Yogesh Bandagale
- January 08, 2026
- 112 views
रत्नागिरी, दि. ८ (जिमाका) : महाराष्ट्र शासनाच्या महिला व बाल विकास विभाग व जिल्हा महिला व बाल विकास अधिकारी कार्यालयाच्यावतीने आयोजित जिल्हास्तरीय ‘चाचा नेहरू बाल महोत्सवा’चा बक्षीस वितरण समारंभ आज मोठ्या उत्साहात पार पडला.
गेल्या तीन दिवसांपासून सुरू असलेल्या या महोत्सवाची सांगता बक्षीस वितरणाने झाली. कार्यक्रमाच्या अध्यक्षस्थानी उपविभागीय पोलीस अधिकारी निलेश माईनकर होते, तर प्रमुख पाहुणे म्हणून ‘२ महाराष्ट्र नेव्हल युनिट एनसीसी’चे कमांडिंग ऑफिसर रामंजुल दीक्षित, जिल्हा रुग्णालयाचे निवासी वैद्यकीय अधिकारी डॉ. शिरसाठ, जिल्हा परिषद जिल्हा कार्यक्रम अधिकारी (महिला व बाल कल्याण) मल्लिनाथ कांबळे तसेच पोलीस उपनिरीक्षक अभय तेली उपस्थित होते. या बाल महोत्सवात विविध संस्थांमधील तसेच नगरपरिषदेच्या शाळांमधील सुमारे ३०० विद्यार्थ्यांनी सहभाग नोंदवला असून विविध क्रीडा स्पर्धा व सांस्कृतिक कार्यक्रमांचे आयोजन करण्यात आले होते. बक्षीस वितरण सोहळ्याची सुरुवात समूह नृत्य व वैयक्तिक नृत्य सादरीकरणाने झाली. अध्यक्षीय भाषणात निलेश माईनकर यांनी मुलांच्या सर्वांगीण विकासासाठी केलेल्या प्रयत्नांचा उल्लेख केला, तर कमांडिंग ऑफिसर रामंजुल दीक्षित यांनी विद्यार्थ्यांना उज्ज्वल भविष्यासाठी शुभेच्छा दिल्या. पोलीस उपनिरीक्षक अभय तेली यांनी मुलांच्या सर्वांगीण विकासासाठी पोलीस दलातर्फे सर्वतोपरी सहकार्य करण्याचे आश्वासन दिले. कार्यक्रमाचे प्रास्ताविक जिल्हा महिला व बाल विकास अधिकारी मनोज पाटणकर यांनी केले, तर आभार प्रदर्शन जिल्हा परिविक्षा अधिकारी अतिश शिंदे यांनी केले. हा महोत्सव यशस्वी करण्यासाठी जिल्हा महिला व बाल विकास अधिकारी कार्यालयातील सर्व कर्मचाऱ्यांनी विशेष परिश्रम घेतले.
