चिपळूण नागरी सहकारी पतसंस्थेच्या ३२व्या वर्धापन दिनानिमित्त संस्मरणीय सांस्कृतिक महोत्सव

चिपळूण नागरी सहकारी पतसंस्थेच्या ३२व्या वर्धापन दिनानिमित्त संस्मरणीय सांस्कृतिक महोत्सव

• by Yogesh Bandagale
• October 19, 2025
• 114 views

चिपळूण : चिपळूण नागरी सहकारी पतसंस्थेच्या 32व्या वर्धापन दिनानिमित्त इंदिरा गांधी सांस्कृतिक केंद्रात एक रंगीबेरंगी सांस्कृतिक महोत्सव आयोजित करण्यात आला. संस्थेचे अधिकारी, कर्मचारी तसेच वाशिष्ठी डेअरी परिवाराने या कार्यक्रमात मोठ्या उत्साहात सहभाग घेतला.

सांस्कृतिक कार्यक्रमाची सुरुवात संचालिका सौ. स्मिता चव्हाण यांच्या गाण्याने झाली. त्यानंतर संस्थेतील अधिकारी व कर्मचाऱ्यांनी नृत्य, गाणी, नाटिका, गटगान तसेच विनोदी स्किटच्या सादरीकरणांमधून उपस्थितांचे मनोरंजन केले. गोंधळ, लावणी, रिमिक्स अशा बहारदार कार्यक्रमांनी सभागृहात उत्साहाचे वातावरण निर्माण केले.

विशेष आकर्षण ठरले वाशिष्ठी डेअरीच्या कर्मचाऱ्यांचे नृत्य आणि गीतांचे संयोजन, ज्यामुळे उपस्थितांची मनं जिंकली गेली. कार्यक्रमातून प्रत्येक अधिकारी-कर्मचाऱ्याच्या कलात्मकतेसोबत एकजुटीचेही दर्शन घडले.

या सोहळ्यात संस्थापक अध्यक्ष मा. सुभाषराव चव्हाण, ज्येष्ठ संचालिका सौ. स्मिताताई चव्हाण, वाशिष्ठी डेअरीचे चेअरमन प्रशांत यादव, मुख्य प्रवर्तक सौ. स्वप्ना यादव, कु. स्वामिनी यादव आणि पतसंस्थेचे सर्व अधिकारी-कर्मचारी उपस्थित होते.

32 वर्षांच्या प्रवासात संस्थेने केवळ आर्थिक क्षेत्रातच नव्हे तर सामाजिक आणि सांस्कृतिक क्षेत्रातही आपली उपस्थिती दाखवली आहे. वर्धापन दिनानिमित्त रंगलेला हा कार्यक्रम सर्वांसाठी एक संस्मरणीय आणि आनंददायी सांगीतिक संध्याकाळ ठरला.